“Alderdi Popularrak ez du Arabako Diputazioa lortuko Aralarren esku baldin badago”. Baieztapen horixe egin du Aralarren Gasteiz kuadrillako hautagai Iñaki Aldekoak. Gasteizen bertan egindako hiru koadriletako hautagaien aurkezpenean, Aldekoak baieztatu duenez, “politika egiteko moduak konfrontatzea nahi dugu, baina herri honek ere hala behar duelako, elkarlana ere beharrezko dugu”. “Zerga politika, kutxen eredua, kudeaketa eredua, diru publikoak ze eratako azpiegituratan inbertitu behar den… Horixe da hauteskunde hauetan erabakiko dena. Oso ondo baitago kristalezko poltsikoak izatea gardentasuna ahotan, baina benetan batzar nagusiek diputazioaren kudeaketa kontrolatzeko gaitasuna izango duten da jokoan dagoena”, esan du Aldekoak.

“Horregatik, eta PPk Patxi Lopezekin duen hitzarmen unionista Arabako erakundeetara ekarri nahi duelako, Aralarren esku balego ez da horrelakorik gauzatu; Aralarrek aurre egingo die unionistei Araban”. Are gehiago, Aralarren antolaketa idazkari Rebeka Uberak adierazi duenez “politika sozial bera egiten dute jeltzaleek eta sozialistek erakundeetan”. Ildo horretatik Aldekoak azpimarratu duenez, “elkarri laguntza ematen diote Araban eta Madrilen, zerga politikan, garapen ereduetan, krisiari aurre egiteko ereduan, pentsio eta lan erreforman, bai eta hitzarmen kolektiboaren erreforman ere eta gu ez gaude ados. Horregatik diogu ‘Ireki bidea Ezkerrari’. Gure ideiak konfrontatzeko garaia da eta horixe da gure helburua”. Hala ere, Aldekoak adierazi duenez, “konfrontaziotik harago, elkarlanerako prestutasuna dauka Aralarrek, herri honek elkarlana beharrezko duelako; are gehiago Araban, inork ez baitu gehiengo absolutua eskuratzeko ahalmena. Beraz, maiatzaren 22tik aurrera gobernu programez eztabaidatu beharko da eta Aralar, proposamen programatiko eta estrategikoak kontua hartuz, gai izango da elkarlana eta ideologia uztartzen, hartu beharreko erabakiak hartzeko”.

Iñaki Aldekoa izango da Gasteizko koadrilako hautagaia, Andoni Estefania Aiarakoa eta Gorka Iriondo Tierras Esparsas koadrilatik.